تسجيل الدخول


العودة   منتدى مملكة الدوشجية > أرشيف الدوشجية > الرياضة > السيــارات

السيــارات هتلاقى احدث صور السيارات واخبار السباقات المثيره (فورميلا - رالى ) فرصه لمحبى الاثاره

كيف تحمى سيارتك من السرقة هام جدا لجميع الاعضاء

حبيت انقل لكم موضوع فى غاية الاهمية والخطورة موضوع مركز , يهدف إلى اتخاذ تدابير وقائية ضد أساليب السرقة العديدة,

Like Tree1Likes
  • 1 Post By mimo vip
 
 
  #1  
قديم 11-29-2018
الصورة الرمزية mimo vip

دوشجي فعال

رقم العضوية : 66313
تاريخ التسجيل : Aug 2018
مجموع المشاركات : 1,212
mimo vip غير متواجد حالياً

mimo vip


 




تحمى سيارتك السرقة لجميع الاعضاء







حبيت انقل لكم موضوع فى غاية الاهمية والخطورة

موضوع مركز , يهدف إلى اتخاذ تدابير وقائية ضد أساليب السرقة العديدة, اللي منتشرة بشدة في مجتمعنا لدرجة اننا حاسين ان كل شوارع مصر بتعدي من جوة محطة مصر !!


علشان الإنجاز والوضوح , هاقسم الموضوع بحيث يكون شامل لأساليب سرقات العربيات

1- سرقة العربيات وهي مركونة, الطرق التقليدية والخدع المستحدثة
2- سرقة العربيات وهي متحركة, وكيفية التصرف ساعتها
3- سرقة التاكسيات (سواءً كانت سرقة التاكسي نفسه أو سرقة سواق التاكسي للركاب)


نبدأ بسم الله


أول حاجة , هانتكلم على سرقة العربيات وهي مركونة

الطرق الطبيعية للحرامية من زمان , ومن وقت وجود الدواب , هو فك كل ما يربط الدابة (جمل – حمار – حصان أو أي حاجة تانية قابلة للركوب ) , وسحبها بدون إحداث أي صوت والتسلل بها هروباً وبعيد عن أعين الناس

ومن وقت اختراع العربية , ظهر نوع جديد من اللصوص هدفهم الأساسي هو سرقة العربيات وتقليب كل مافيها وكل مايمكن أن يكون له ثمن وقابل للبيع

وبالتالي ظهر أنواع من اللصوص متخصصين في سرقة الكاسيت (أيام الكاسيت والشرايط) , سرقة تجهيزات داخلية زي أجهزة السي دي أو الدي في دي , سرقة التوصيلات الداخلية للبلوتوث ...ووصولاً لسرقة الولاعة !!

وأيضاً ظهرت عصابات متخصصة في سرقة العربيات ككل , وفكها وبيعها قطع غيار (أسهل وأسعارها مش بتقع زي العربيات المسروقة بالكامل) ... أو بيعها بالكامل بعد عمل أوراق ملكية مضروبة بالاشتراك مع موظفين فاسدين في إدارات المرور المختلفة

سرقة العربية وهي متوقفة بدون تواجد صاحبها مش بيتعمل بأسلوب احتيالي , لأ بيكون أسلوب سرقة إجرامي صرف , وبيعتمد اعتماد كلي على اقتحام العربية , إما عن طريق:
1- طفاشة (في حالة السيارات القديمة)
2- مفتاح مصطنع (في حالة السيارات الحديثة بدون جهاز مانع سرقة – إيموبيلايزر)
3- مفتاح مصطنع مشفر – في حالة تمكن السارق من برمجة مفتاح جديد بعد ما يقلب صاحب العربية في المفتاح الأصلي
4- كسر الزجاج أو الهوايات
5- الاقتحام عن طريق الشنطة الخلفية وإزالة الكنبة الخلفية

أهم أساليب منع اقتحام السيارة لسرقتها أو سرقة المتعلقات داخلها:

1- الإنذار (فكرة قديمة واتهرست 300 مرة قبل كدة)

2- أفلام الحماية (يتم تركيبها على الزجاج من الداخل لمنع كسره)

3- انك ماتسيبش متعلقات شخصية أو شنطة اللاب توب (كعادة معظم الناس دلوقتي) , ماتسيبش موبايل أو جهاز جي بي إس ...ماتسيبش جهاز دي في دي قابل للفك ... ماتسيبش علبة سجاير أو حتى خمسة جنيه مقطعة (مرة حرامي دخل عربية والدي وأكل باكو بسكوت كان جواها) ... للسادة الضباط ماتسيبليش بدلتك الميري متعلقة على الشماعة ورا ... يا حد هايسرق العربية بحالها نكاية فيك ... يا حد هايسرق البدلة الميري علشان يعمل بيها نمرة !! ...ماحدش يسيب ملابس وجواكت وحاجات لها قيمة على الكنب والكراسي لأن دي مدفوع فيها فلوس ومظهرها مغري للحرامي في كثير من الأحيان


4- بلاش نظام (هاخبي الحاجة تحت الكرسي) ... كل الناس بتعمل كدة وبالتالي كل الحرامية عارفين ان كل الناس بتعمل كدة ! ... يعني سيادتك هو بيلاحظ طرف الحاجة من تحت الكرسي ,,, ده شغله وهو بيؤديه بكل ضمير وأمانة !!


5- غطي عربيتك ... ماحدش هايحاول يعمل حاجة حرام ومخفية وياخد مخاطرة انه يشيل الغطاء من عليها ويكشف نفسه قصاد الكل – إلا في حتة مقطوعة وهو شغال براحته وبمزاج!

أما عن أساليب منع سرقة السيارة ككل:


1- أقدم أسلوب ولا زال أنجح أسلوب: الزرار المخفي , بيتعمل عند ميكانيكي علشان فصل الكهرباء عن العربية ككل , وبينفع للسيارات القديمة فقط بدون سنترلوك أو إنذار

2- للسيارات الحديثة بيتم عمل نفس الفكرة في مكان خزعبلي , بيفصل طلمبة البنزين وبالتالي بتفضل الكهرباء موجودة علشان جهاز الإنذار يفضل شغال , لكن بتفضل طلمبة البنزين مفصولة لحد ما يتفتح الزرار (خد بالك ان الحرامي ميكانيكي ولو كان عنده الوقت هايجيب مكان الزرار فين)

3- جهاز الإيموبيلايزر (مانع تشغيل المحرك بدون مفتاح السيارة الأصلي) , ده حل أكيد بإذن الله وبدون المفتاح الأصلي العربية مش هاتدور , باختصار فكرة عمل الجهاز ده (وبالمناسبة هو تجهيز أساسي في العديد من السيارات الحديثة) وممكن يتركب برة عند متخصصين , انه كل مفتاح فيه شريحة إلكترونية بمثابة بطاقة تعريف , بتتواصل مع كونتاكت العربية وقت الدوارة بنفس أسلوب الريموت كونترول العادي , ولازم تتوافق الإشارتين علشان المحرك يستجيب ويقول أوكاي المحرك يبدأ يدور لأن ده المفتاح الأصلي ... من غير كدة العربية مش هاتدور (المفتاح الأصلي والاحتياطي للعربية بيحتوي على الشريحة دي)

4- قفل الدركسيون اللي جاي مع العربية , ناس كتير مايعرفوش ان العربية لما بتبطل المحرك وتشيل المفتاح (وتسمع تكة لطيفة كدة وانت بتشيله) انت ممكن تلف الدركسيون ناحية اليمين أو الشمال 45 درجة , ساعتها هايعمل لوك ويقفل الدركسيون ويتجمد مطرحه مايروحش يمين ولا شمال طول ما الكونتاكت مقفول , علشان يرجع يلف تاني لازم تدخل المفتاح الأصلي وتلف الدركسيون سنة بسيطة ناحية اليمين والشمال علشان القفل يتفتح تاني ,,, انا باقول كدة علشان معظم الناس مش بيستعملوا الخاصية دي ... والحرامية مزأططين بسبب كدة !

5- قفل الدركسيون اللي بيتباع برة ... هو فكرة فاشلة , بيضيع وقتك علشان كل مرة تفتحه هاتاخد وقت (مرة المفتاح اتكسر جوة القفل ووالدي تعب جداً علشان يعرف يطلع بالعربية) ... الحرامي بيبقى مجهز ... بيحط حقنة مليانة مية نار جوة القفل وبعد كدة بيفتحه زي الحلاوة !!!

6- نفس الكلام بينطبق على كلبش العربية , فيه كلبش بيتباع بيتركب على فردة كاوتش خلفية في العربية ويمنع تحركها بدون ما تتفك بمفتاح مخصوص لكدة .... ناس كتير عندهم الاختراع ده , ومش عارف هل بيفكوه هو كمان ولا لسة ماوصلتلهمش التكنولوجيا الكافية !!

7- بخصوص سرقة الكاوتش , خصوصاً الأنواع الغالية والجنوط الاسبور ... فيه حاجة اسمها "لوك كاوتش" , فكرته بسيطة هو عبارة عن انك تغير مسمار ربط الكاوتش (اللي بيتفتح بمفتاح + اللي في العربية) وتخليه مسمار بشكل مختلف ,,, بيتم فتحه عن طريق مفك مخصوص مش بيكون غير معاك انت (ماتسيبهوش في حتة مكشوفة وسهلة في العربية ولا في شنطة عربية سهلة الفتح) ... بكل بساطة حرامي الكاوتش بالذات بيكون راكب تاكسي أو عربية قديمة وبيركن على جنب بيعمل نفسه بيغير كاوتش عربيته هو ... ويغطي جنب عربيتك المواجه ليه ويعمل مصيبته وهو متداري ... بيجيب مفتاح + اللي معاه ويفك العجل ... وبالتالي في وجود الاختراع ده مش هايقدر بإذن الله يفكه ... بس سيادتك تكون متأكد انك مش جايبه من عالرصيف ... علشان ماتلاقيش الحرامي عامل حسابه وجايبلك مفتاحه معاه وهو جاي !

8- ركب فيها جهاز تتبع ... متجرب من ناس كتير وماركته كويسة ...دور عليه واللي يسأل مايتوهش , فيه أجهزة عندها خصائص عبقرية زي انه يتصل بيك لما باب العربية يتفتح أو يحصل فيها أكشن معين ... أو لو الموتور دار أو لو اتحركت العربية حتى من غير ماتدور ....الأجهزة دي أسعارها بتتراوح من 500 إلى 2500 ... وكله حسب ماركته وخدمة الدعم بتاعته ...أعتقد فيه موضوعات بتتكلم على تجارب مع الأجهزة دي (ده ينفع حل ناجح للحرامية اللي بيجيبوا ونش إنقاذ وياخدوا العربية كدة هيلا هوب بالكامل ... وطبعاً ماحدش بيسألهم في الطريق فين رخص العربية دي ورايحة فين)

9- دايماً خلي كاوتش العربية عليه طاسات ... يعني ماتسيبش المسامير كدة مكشوفة للهواء الطلق , علشان مايكونش سهل فكها ...خصوصاً ان فيه حرامية بييجيوا يفكوها يلاقوا خطر عليهم يسيبوها مفكوكة ويجروا ... والراجل الغلبان يركب العربية يفاجأ ان الكاوتش طار وهو ماشي بيها ويتسبب في حادث أليم (صديقة لزوجتي عربيتها اتقلبت بيها بسبب الحركة دي وأصيبت ) , ماتنساش ان تركيب طاسة على الكاوتش يستلزم ان بتاع الكاوتش يركبلك عليه حاجة اسمها "أفيز" بلاستك , مهمته انه يمنع الطاسة من انها تفك مع السرعات والمطبات ,, ومهمته انه يصعب عملية فك الطاسة قبل فك الكاوتش

يعني خلي عربيتك فيها إنذار ... ركب فيها جهاز بيمنع دورانها بزرار مخفي (إذا ماكانتش مجهزة بإيموبيلايزر) ... ركب عليها جهاز إيموبيلايزر ... اعمل طبقة حماية للزجاج ضد الكسر ... ماتشيلش فيها متعلقات شخصية أو أجهزة ... اركنها في مكان قريب من نظرك أو قريب من حد بيحرسها ... غطي الكاوتش بالطاسات وركب عليه لوك علشان مايكونش سهل الفك ... ركب فيها جهاز تتبع أو مانع دوران عن طريق الموبايل , غطي عربيتك واقفل الدركسيون أول ماتوقفها


الحاجات دي كلها تصلح منفردة أو مجتمعة , لأنها طبعاً هاتكون مكلفة لو اتعملت كلها مرة واحدة ...اعملها بمراحل , اعمل جزء منها أو كلها ...أي حاجة بس خد بالأسباب



نيجي للحيل الحديثة في سرقة العربيات أثناء سيرها

هانتكلم على الحيل والوسائل المبتكرة , وبعد كدة ندخل في الطرق اللي أصبحت للأسف تقليدية


1- أول ماتدور العربية وتيجي تتحرك بيها تسمع صوت حاجة معدنية مكسورة
الحقيقة ان بيكون الحرامي رابط حديدة أو ماسورة في العربية من ورا ... بحيث تفاجأ بيها وتنزل تشوف فيه إيه ...يدخل هو مكانك في غمضة عين ويسرق العربية وهي دايرة

الحل: أولاً ماتنزلش من العربية تحت أي ظرف من الظروف وانت سايب المفتاح جواها , لا تقوللي هاجيب حاجة من الكشك والعربية قدامي اهي ولا تقوللي المسافة قريبة وهاقدر الحق أي حاجة ... الحرامي بيسرق الكحل من العين ...وماتنساش ان دي مهنته وهو محترف فيها

ثانياً , الأصل في فن قيادة السيارات انك تلف لفة كاملة حوالين العربية قبل ماتركبها ... مش هاتاخد منك 10 ثواني , خلالها هاتكتشف لو حد حكهالك أو أخدت خبطة وهي واقفة ... أو لو فيه كاوتش نايم , أو لو حد عامللك فيها فخ علشان يسرقك أول ماتتحرك , كمان علشان تتأكد ان مافيش شخص غلبان نايم وراها , أو قطة كانت داخلة عند الكاوتش تتدفى في البرد (معظم القطط المصرية بقت عارفة شغلها أول ماتسمع باب العربية بيتفتح ..وتسيبهالك من سكات)

ثالثاً: لو حسيت بالخطر في حالة نزولك من العربية استمر في السير بيها لأقرب مكان آمن ممكن تنزل تشوف إيه اللي بيحصل (في حالة لو ماعملتش أولاً وثانياً ونسيت , عادي كلنا بننسى)

حيلة الورقة اللي على الزجاج الخلفي
أول ماتيجي تركب العربية , وتتحرك بيها تلاقي ورقة على الزجاج الخلفي مانعة للرؤية ... تيجي تنزل من العربية تشيلها تلاقي الحرامي عمل معاك نفس اللي حصل في الحيلة السابقة

الحل: نفس الحلول في الحيلة السابقة

3- حيلة البيض

وانت ماشي بالعربية تفاجأ ببيضة نيئة اترمت على الزجاج الأمامي أو الخلفي ... غالباً بتكون معدي تحت
كوبري أو فيه منطقة عالية في الطريق

بالطبع انت هنا مش قدام طفل بيلعب بالحاجات اللي جوة تلاجة أهله ... وبالتأكيد مافيش فرخة هاتطير على ارتفاعات عالية وكمان تبيض ..وبيضتها تقع فوق الزجاج الأمامي لعربيتك !!!

اللي بيحصل هو ان الحرامي بيكون عامل عصابة .. عيل يرمي بيضة من مكان مرتفع على الزجاج الأمامي ... تقوم انت تتخض قدام عنصر المفاجأة ... وبيكون الحل هو انك تركن على جنب علشان تمسح آثارها (حل سيئ) وده عز الطلب للحرامي اللي هايفاجئك علشان يسرق العربية ... أو انك تشغل مياه المساحات علشان تمسحها وانت ماشي (حل أسوأ ) ... لأن ساعتها الزجاج كله هايتحول إلى بياض بيض ني والرؤية هاتنعدم

الحل: استمر في القيادة لحد أقرب مكان آمن , وشيل آثار البيضة باستخدام فوطة جافة الأول بعد كدة صابون على طول ... بس الأهم من كدة انك تكون بعيد عن المكان ده تماماً وبعيد عن أي عربية بدأت تتبعك من مكان "قصف العربية بالبيضة" !!!


4- حيلة "التانك بيخر يا كابتن"

وانت ماشي في أمان الله تلاقي واد راكب عجلة أو موتوسيكل يقوللك "الحق التانك بيخر يا كابتن" , طبعاً انت تتفزع وتحس ان فيه مصيبة حصلت ... تقوم نازل جري تشوف فيه إيه ... وده عز الطلب بالنسبة للحرامي

الحل: سيبك من الواد العبيط ده (مع أخذك في الاعتبار ان 20% ممكن يكون كلامه صح) ... استمر في القيادة ...حتى لو التانك بيخر هاينزل قد إيه ؟؟ وهل فعلاً ظهرلك على مؤشر البنزين انه بينقص بسرعة ؟؟ ... في كلتا الحالتين استمر في القيادة من غير أي نزول من السيارة تماماً ... وابقى ادخل محطة بنزين شوف الحكاية , ده لو كان بيخر فعلاً

5- حيلة الطفل الرضيع اللي على جنب


ماشي في حالك تلاقي عربية طفل ... أو طفل رضيع ... أو عيل صغير بيعيط جوة سبت أو كاريكوت أو أي حاجة ممكن يتشال فيها عيل ... تركن على جنب (خصوصاً قلب البنات بيبقى حنين) يكون ده عز الطلب بالنسبة للحرامي

الحل: سيب أهل المنطقة هما اللي يتصرفوا ... الحالات دي لو كانت صحيحة بتكون حالات إنسانية ولها مساءلة قانونية وأفضل شئ يكون تحت ولاية أمر حد في نفس المنطقة اللي هو مفقود فيها , ده لو كان فعلاً طفل مفقود أو لقيط , أما في معظم الحالات بتكون مجرد فخ علشان الإيقاع بالضحايا

وانت ماشي عادي بتلاقي واحد اترمى على الأرض وعمال يصرخ , انت ياعم خبطتني , مش تفتح , انتوا ماعندكوش قلب ولا رحمة , هو اكمني غلبان يعني ماليش ضهر ولا تمن في البلد دي .... إلخ إلخ

انت طبعاً بتكون سرحان , لأنه بينقي ضحاياه من الناس السرحانة سواء في موبايل بيتكلم فيه أو في البنت اللطيفة اللي قاعدة جنبه أو أشياء أخرى كتير ... بس انت كذلك متأكد انك ماخبطتهوش (ساعات هو بيروح يخبط نفسه في العربية علشان تسمع صوت خبطة وتتخض) ... طالما انت قدام ربنا واثق من نفسك انك ماخبطتش حد , (ماتعيشيليش بقى جو انا ماخبطتهوش وهو غرقان في دمه متكوم على الأرض وإزاز عربيتك مكسور , احنا بنتكلم على واحد بيتلكك علشان يفتعل معاك خناقة وينزلك من العربية) , خد بعضك وامشي من سكات من غير قلق , وخليك بارد بشكل مستفز على غير العادة علشان مايحاولش يغضبك وينزلك من عربيتك تضربه ... ولو حصل بقى ونزلت من عربيتك (نسيت وكلنا بننسى) ...قول له تعال على القسم اعمللي محضر ... ساعتها هايفلفص منك وابو رجل مسلوخة ده اللي كان مرمي على الأرض دلوقتي هاتشوفه طلع يجري ولا زعيم السنافر !!

7- الشحات الرزل

واقف في إشارة , جالك شحات , وانت ماديتهوش حاجة , أو اديتله مثلاً نص جنيه ... هايقعد يبرطم ويقول كلام هرتلة , وبعدين يتف عليك أو على العربية (بيتعمد انها تكون على وشك , آسف لو كلامي ده قرف بعض الناس لكن ده بيحصل)

الحل: تعال على نفسك ونضف نفسك واحذر كل الحذر انك تنزل وراه تعمل أي حاجة ...إوع ينزلك من عربيتك خصوصاً انك هاتكون في قمة الغضب وهاتسيب مفاتيح عربيتك في الكونتاكت ... (ماينفعش هنا ننسى بالنسبة للناس اللي نسيت في الكام حيلة اللي فاتوا) , وحافظ على زجاج عربيتك مغلق قدر الإمكان


8- الموتوسيكل اللي بيخبط في الشنطة

ماشي لا ليك ولا عليك ... وفجأة تسمع طاخ بوم تش ... موتوسيكل خبط عربيتك من ورا , هاتلاقي الواد اللي راكب الموتوسيكل زي ماهو مش هايقع ولا هايتعور , وكمان هاتلاقي ان وراه حد عمال يزعق ويتخانق , إوع تنزل وتسيب عربيتك وكمان مفاتيحك , نصيحتي ليك ماتنزلش خالص

ليه ؟ أول حاجة خبطة الموتوسيكل من ورا بتكون مؤثرة في الإكصدام وده أمره سهل .. تاني حاجة المضرور بجد هو اللي كان راكب موتوسيكل ... تالت حاجة انت لو نزلت من عربيتك بيكون الموضوع عبارة عن عصابة والمرة دي مش بيتسحبوا ...المرة دي بيكون بالإكراه وعربية تانية قدامك بينزل منها ناس يتصرفوا معاك...رابع حاجة ماحدش هايخبطك من ورا ويكون هو الصح , القاعدة المرورية بتقول بغض النظر عن طريقة التوقف المفاجئ وأسبابه , القادم من الخلف هو المخطئ في حالة التصادم , يعني مايقعدش يبرطم يقوللك انت اللي وقفت مرة واحدة يا كابتشن والكلام الاهبل ده ...


الحل: خد بعضك وامشي من غير كلام كتير , عيش الجو المصري بتاع الحمدلله جات سليمة واللي ييجي في الريش بقشيش وحمدالله على سلامتك وتتعوض ان شاء الله , إكصدام العربية حتى لو راح بالكامل "وده احتمال مستبعد" أرخص بكتير من تمن العربية بحالها أو الفدية بتاعتها لو هما خاطفينها مؤقتاً

ملحوظة : الحيلة دي ممكن تتنفذ بعربية قديمة , خصوصاً لادا القديمة أو فيات 1300 أو بيجو 504 ... حاجة كدة ماتتأثرش بالخبطات وتصليحها كلها على بعضها بتلاتة جنيه ... هاتكون في مكان مش محتمل السرعة علشان تتخبط من ورا ...خلي المنطق يشتغل

9- البنوتة اللي مستنية الأوتوبيس في حتة مقطوعة

تيجي كدة ماشي في طريق فاضي وفجأة , في حتة مافيهاش مساكن ولا بيوت ولا شركات وتلاقي اللي واقفة كدة لحالها , قال يعني مستنية تاكسي أو مواصلة في المكان القاحل ده ... طبعاً قلبك الحنين وشهامتك يبدأوا ينقحوا عليك (قال يعني) .. وتركن على جنب و "تترجاها" انك توصلها
الباقي معروف ... هاتترجاها انها تاخد العربية بس وتسيبك سليم !!

الحل: ماتركبش حد ماتعرفهوش , وخصوصاً في أوقات الليل أو الأماكن الغير مسكونة , أو في مكان مش منطقي تواجد حد قدامه يقف يستنى مواصلة
وماتقولليش ماهو شكله نضيف وابن ناس (كل الناس ولاد ناس, التعبير ده مش صح أصلاً من الأول) ... أو (هي بنت والوقفة كدة خطر عليها) , لأنها هاتكون خطر عليك انت نفسك بعد كدة !!

ملحوظة: الحيلة دي مش لسرقة السيارات فقط , دي مستعملة لتهريب المخدرات من الكمائن عن طريق شنطة البنوتة اللطيفة اللي راكبة عربيتك دي !

10- الحقوني شاب اتحرش بيا

تلاقي واحدة راكبة عربية نص كم , وهي أصلاً ست أو بنت نص كم ... وفجأة تلاقيها عمالة تسبل عيونها , وتديك كلاكسات , وتلاغيك ... وطبعاً جينات الخيانة تبدأ تشتغل جواك وتلعب الخمر برأسك الأغبر ... أول ماتيجي تتجاوب معاها هاتنزلك من عربيتك , وغيرك هايركبها تحت تهديد السلاح !!
وساعات يكون رد فعلها لما تبدأ تتجاوب معاها انها تستغيث بالـ "مارة" اللي مش بيكونوا فعلاً مارة , بيكونوا جزء من العصابة في المكان الموعود , يتلموا عليك يرنوك علقة علشان عاكست سيدة بريئة ماشية في حالها , آه ياخلبوص !! ...وتفوق من العلقة دي على عربيتك ومحفظتك وموبايلك رايحين ... بصراحة في الموقف ده انت تستاهل , علشان كدة مش هاحط حل للحيلة دي !!


ندخل بقى في الطرق التقليدية للسرقة أثناء تحرك العربية

الطريقة الرئيسية بتكون في مكان شبه هادي , فيه مطب والطريق مش عريض قوي...عربية تظهرلك في المراية , بتقرب منك بسرعة عند مكان المطب وانت بتهدي , تقفل عليك من قدام على الشمال (لازم يكون على الشمال) ... ينزل منها اربع جتت طول بعرض معاهم أسلحة آلية (بتكون بالفعل متعمرة مش لعب أطفال) ... واحد منهم يفتح باب العربية ينزلك , أو يشاور عليك بالسلاح ويهددك لو كنت قافل السنترلوك علشان تفتحه , معظمنا شاف الفيديو الحزين بتاع سرقة عربية على طريق كورنيش شبرا , وفوجئ بسلبية الناس اللي كانوا معديين

الحل: في الطرق اللي انت ماشي عليها خلي عينك على الـ 3 مرايات , احفظ الناس اللي ماشية حواليك وماتسيبش عربية مشبوهة تجيلك من الشمال خصوصاً لو قربت على مطب , تجاوزها وتجاوز المطب بسرعة وتخلص منهم... لو حصل وقفلوا عليك ماتتوقفش وادخل في وش عربيتهم (غالباً بتكون كيا سيراتو ...ادخل ولا يهمك دي عربية ورق) وانطلق بعيداً بأقصى سرعة , ماتنزلش من عربيتك مهما كان التمن طول مانت قادر تتحرك بيها , أما لو فعلاً حصل ووقفوك وماكانش فيه مخرج بالعربية , قدامك حل من اتنين : يا تدافع عن مالك أو أهلك لو راكبين معاك العربية حتى لو هايقتلوك , وزي ما النبي عليه الصلاة والسلام قال من قتل دون ماله فهو شهيد . ومن قتل دون دينه فهو شهيد . ومن قتل دون دمه فهو شهيد ، ومن قتل دون أهله فهو شهيد
الراوي: سعيد بن زيد المحدث:الترمذي - المصدر: سنن الترمذي - الصفحة أو الرقم: 1421
خلاصة حكم المحدث: حسن

, أو الحل التاني انك تنصرف من سكات وتديهم العربية ... ساعتها هاينفعك جداً جهاز التحكم عن بعد وتتبع السيارة (لو كنت مركبه) ...ونصيحتي تستعمله بعد ربع ساعة , مايكونوش قريبين منك علشان ينتقموا منك لو وقفت العربية عن بعد وانت لسة في متناول أيديهم

أما عن ازاي بيعرفوا يتصلوا بالضحايا يساوموهم على عربياتهم , فللأسف هما بيعرفوا رقم تليفونك من المحضر اللي بلغت بيه عن سرقة عربيتك !! .. من الواضح ان ليهم حد متعاون معاهم في جهات تنفيذ القانون !!

نيجي بقى للجزء الغريب في الموضوع , والخاص بأحدث أساليب سرقة التاكسي !

1- حيلة البنات المتدلعة:

سواق التاكسي بطبعه بيكون مزاجنجي في اختياراته , يعني بيختار الناس اللي – من وجهة نظره – هايريحوه في مشواره , يطلع منهم بفلوس كويسة من غير فصال ومناهدة , أو يطلع منهم بمصلحة ما , والمصلحة دي معروفة لو وقف لبنوتة دلوعة قوي
البنوتة الدلوعة دي مش بتكون لوحدها , بتكون كذا بنت لابسين اللي على الحبل وحبل الجيران , حركاتهم توحي بأنهم سهلين قوي , بعد فترة يبدأوا يتدلعوا على السواق ... يبدأ يتجاوب معاهم , يبدأوا يسحبوه على وجهة بعيدة شوية , وبعد كدة تطلع الأسلحة فجأة

الحل: مش هاقوله لأن اللي يعمل كدة يستاهل

2- حيلة الشيخ البركة:

عم الشيخ بيركب قدام , دقنه طويلة لحد نص صدره , معاه السيدة المصونة زوجته المنتقبة , خلال السكة بقى يدي نصايح وكلام كله تقوى ...بعد كدة يطلع إزازة عطر ...ويقول للسواق "خدلك نفحة يا راجل" .... وتبقى هي النفحة ... هايقوم بعدها يلاقي نفسه مرمي على الرصيف من غير أي حاجة لها تمن ...غير بس حاجات قليلة تستره

الحل: ماتشمش أي حاجة مع الركاب ياسطى ... وخلي عينك مليانة وماتاكلش أي حاجة بيعزم عليك بيها الركاب ...ولو جعان قوي وعينك فيها , خدها منهم لو عزموا عليك بيها , وكلها بعدين وسط السواقين زمايلك أو في بيتك ... ومانصحكش بكدة كذلك , لأن لو كان فيها مخدر ممكن جسمك مايتحملهوش وتروح فيها

3- حيلة الراجل الفنجري , وزعوا فلوسي !

يركب بيزنس مان , ماسك شنطة جلد كدة ولابس حاجات شيك كلها سينييه ... وبعد شوية , يبدأ الراجل يسرح بفكره , بعدها يفتح الشنطة يطلع رزمة كلها ورق 200 ...يقعد يعد فيه يعد فيه ...بعدين يفتح الشباك يرمي 200 جنيه منه ويقفله تاني !! ....طبعاً السواق تجيله حالة من الهلع المستهبل ...بتعمل ايه ياعم ؟؟ يقول له أصل انا عندي فلوس عايز اطلع عليها زكاة ومش لاقي حد غلبان , فبارمي الفلوس علشان يمكن حد غلبان يلاقيها ياخدها

بعد شوية يرمي 200 جنيه تانيين , السواق ساعتها هايركن ويقول له طب مانا غلبان , وينزل علشان ياخدها جري ... طبعاً يرجع هايكتشف انه دلوقتي بقى غلبان بجد ...وان الراجل اشترى التاكسي بتاعه بـ 200 جنيه !!

الحل: فكك ياسطى من الخمسة جنيه المقطعة دي ... خليك واعي وابن بلد واعرف كويس ان ده واحد بيستغفلك ... وحتى لو راكب معاك واحد اهبل بيحب يرمي الفلوس من الشباك , فانت عندك مهنة وعمل وهاتاخد منه في النهاية فلوس التوصيلة ...الطمع يقل ما جمع

4- حيلة البنت اللي تركب قدام:

تشاور بنت لوحدها , لكن على غير العادة تركب جنب السواق ... في معظم الحالات السواق مش هايمانع ... لكن هاتمسك موبايلها وتبدأ تبعت رسايل أو تتكلم مكالمة بالشفرة مع "واحدة صاحبتها" .بعد كدة يظهر شباب رايحين نفس الحتة اللي هي رايحاها.. وفجأة يركب الشباب اللي جايين معاها من مكان قريب ويبدأ الفيلم الهندي

الحل: ماتركبش حد مع حد ياسطى ...وخلي عينك مليانة وبطل طفاسة ...وبلاش نظام (طالما رايحين نفس السكة إيه اللي يمنع) ...

5- حيلة رجل الأعمال المسافر:

يركب واحد مظهره يدل على انه رجل أعمال ... يقوللك عايز اسافر "اسكندرية" مقابل مبلغ مغري ...السواق يوافق ... في الطريق يقوللك انا جعان ...ينزل وياخدك معاه عشان تاكل ... خلال الأكل يقوللك نسيت حاجة في العربية , ثواني اجيبها وارجع ...يقوم يجيبها , ماتلاقيهوش رجع لا هو ولا العربية ....

الحل: اللي يركب معاك مهما كان مظهره وملبسه , شخص غريب حتى لو أخدت عليه كذا يوم , ماتسيبش مفتاح عربيتك مع حد غريب أو جوة العربية وحد غريب فيها


طبعاً فيه حيل أكتر من كدة بكتير مع سائقي التاكسي ... لكن ده اللي أعرفه وأعرف انه ماكانش سواق فشار بيحكي حكاية من وحي خياله.


نيجي للحيل المستعملة من قبل سواقين التاكسي لسرقة الركاب:

أولاً ... خلينا نحط قواعد عامة لو حبيت تركب تاكسي, وياريت نحس شوية بأهميتها

1- ماتركبش تاكسي من غير نمر ... ماهو يا مسروق , يا مسروق !! ... عايز واحد حرامي يوصلك كدة هو بسهولة؟؟!!

2- ماتركبش تاكسي فيميه (مش منطقي التاكسي يكون فيميه يعني لامؤاخذة) , أو يكون مركب ستاير .... لازم اللي برة التاكسي يشوف اللي بيحصل جواه لو لا قدر الله تم استغلال الموقف.

3- لو حاسس ان سواق التاكسي شكله مسجل خطر أو أسلوبه مش تمام , أو اتصل بحد في الموبايل وقعد يتكلم معاه على انه مراته ولا صاحبته , ولا جاب سيرة انه "معاه حاجة كويسة" , أو انه "قريب من المكان اللي انت فيه" ...أو "قابليني كمان ربع ساعة عند المكان الفلاني" .... خد بعضك وانزل على طول , وارميله الفلوس اللي العداد عاملها ... لو حاول يضغط عليك تقعد قول له انا نازل دلوقتي ومزاجي كدة !! وماحدش له حاجة عندي

4- ماتخليش حد تاني غريب يركب معاك بتاتاً ... وماتحاولش تركب تاكسي راكبه ناس تانين مهما كان معدل الزحمة وانعدام وجود تاكسيات تانية ... ولو سواق التاكسي حاول يركب حد تاني معاك , طلع كل الغضب اللي جواك وانزل وسيبله التاكسي وادفعله اللي في العداد وارميهوله...على الأقل لو هاترضى ان حد يركب معاك يبقى ميكروباص احسن !!

5- لازم تعرف أبواب التاكسي بتتفتح ازاي, وحتى لو العربية بتعمل لوك أوتوماتيك للأبواب مع تخطيها سرعة 20 كم ساعة , لازم تعرف ان الكلام ده في التاكسي الاسبيرانزا أو الـ BYD بس ... لو تاكسي هيونداي فيرنا عمل كدة خد حذرك وشوف الأبوب ممكن تتفتح ازاي ...ماتسيبش فرصة لحد يتمكن من حبسك , خصوصاً لو الزجاج كان مقفول بدعوى "التكييف شغال يا بيه".

6- تجنب الشخص اللي نظراته ليك مريبة , اللي معلق عينه على متعلقاتك والأجهزة اللي معاك , أو لو كنتي بنت أو سيدة لو عمال يتفحص جسمك بعينيه وشكله ناوي نية مش تمام , التاكسيات مالية البلد ...والله الغني عن ده سواق

7- كل تاكسي بيكون مكتوب على أبوابه الجانبية نمرته ... وأحيان تانية بيكون مكتوب على التابلوه من جوة (كان قرار قديم وماحدش بيلتزم بيه) , حاول حتى تلمحه وتخليه في ذاكرتك على الأقل لحد ماتنزل منه بسلام وأمان بإذن الله.

8- لو السواق حاول يتفذلك وياخدك من طريق انت مش عارفه , لازم تكون مصر على انك تسلك الطريق اللي انت عارفه حتى لو كانت مبرراته انه هاياخد فلوس أكتر ومش عارف إيه ... أحياناً بيكون السواق عنده حق والطريق هايكلفك كتير – وفيه سواقين كتير جداً ولاد حلال وولاد بلد - لكن لو الطريق ده فيه أماكن مقطوعة وانت حاسس بالخطر , ارفض فوراً وامشي من طريقك الطبيعي.

ثانياً: الحيل اللي بيستعملها سواق التاكسي في التعدي على الركاب (بالسرقة أو بغير ذلك):

1- أبسط واحد , ده حرامي العداد , وانت ماشي بتسمع صوت جاي من مشغل السي دي , بتفتكر انه بيعلي الصوت أو يوطيه , لكن لو نظرك نزل ساعتها هاتلاقي العداد بيحسب 2 جنيه ونص للكيلومتر بدل جنيه وربع ... لفترة مؤقتة وبعد كدة تسمع نفس الصوت تاني والعداد يرجع يعد طبيعي !!! ... نفس الكلام بيكون زرار جوة العداد بيلعب فيه بخفة يد طول فترة الرحلة ... انت بتكون حافظ العداد بيعمل كام في الطبيعي , لو بالزحمة ممكن تزود خمسة أو حتى عشرة جنيه لو كانت زحمة وتوقف شديد ... من تاكسي للتاني ممكن الأجرة تفرق 3 أو 4 جنيه علشان كفاءة العداد ... لكن الفرق لو كان أكبر من كدة يبقى انت بتتسرق يا معلم .... ساعتها انت متاح ليك حرية التصرف

2- السواق اللي مركب ابنه الصبي معاه , أصله كان بيوصله من الدرس !! ... الصبي اللطيف ده ممكن يكون عمال يخبط فيك كل شوية عامل فيها نايم أو بيلعب ...وهو بيقلبك ... خد بالك كويس


3- هانزل اجيب بس سجاير من الكشك – أو هاشتري حاجة من المكان الفلاني , ولما ينزل يرجعلك عايز فكة ... ولما انت تفك له وانت مش واخد بالك تكون الفلوس اللي انت أخدتها مزورة , وتلبسها لوحدك

4- الطريق ده أسهل وفاضي وحلو (خصوصاً لو معاه بنت) ... الكلام ده طبعاً بيشكل خطورة عليها وممكن لاقدر الله يعمل فيها حاجة ... خدوا بالكم

5- خفة اليد في سرقة الموبايل أو أي شئ انت حاطه عند جنبك الشمال (ناحية السواق) ...خلي بالك من حاجتك


في النهاية أرجو من الله الحفظ والسلامة لنا جميعاً ولأهالينا وأهل بلادنا ....ونرجو من الله تعالى الستر والسعادة والحماية لكل ما هو لنا ....


دمتم بخير

تحياتي
الموضوع منقول

 

 

 

 

ننصحك بمشاهدة المواضيع التالية ايضا

كل سنه وانتم بالف صحه يا دوشجية
تفتكر ياسطى في امل
اغرب كهف فى العالم Waitomo Glowworm Cave
عالم الضفادع الملونة قمة الروعه
فن الرسم على الجاموس فى الصين
سيدتان مصريتان تصلان لل level الأخير وتقابلان الوحش
مولود مشوه يشبه الضفدعة شاهد بالصور
اكتشف فوائد الكرش +18



 
التوقيع : mimo vip
قديم 11-30-2018   #2
معلومات العضو

دوشجي جديد

 
وليد جوهر جيــــد
افتراضي رد: كيف تحمى سيارتك من السرقة هام جدا لجميع الاعضاء


ربنا يسترها والله الايام دى السرقة من كل نوع موضوع ممتاز
تسلم يا كبير

وليد جوهر غير متواجد حالياً  
قديم 12-01-2018   #3
معلومات العضو

دوشجي فعال

 
mimo vip
افتراضي رد: كيف تحمى سيارتك من السرقة هام جدا لجميع الاعضاء

المشاركة الأصلية كتبت بواسطة وليد جوهر مشاهدة المشاركة

ربنا يسترها والله الايام دى السرقة من كل نوع موضوع ممتاز
تسلم يا كبير



اللهم امين هنعمل ايه فى البلد اللى مش عارفين هتظبط امتى الله المستعان
شكرا لمرورك الطيب اخى
mimo vip غير متواجد حالياً  
قديم 01-16-2018   #4
معلومات العضو

دوشجي فعال

 
mimo vip
افتراضي رد: كيف تحمى سيارتك من السرقة هام جدا لجميع الاعضاء

المشاركة الأصلية كتبت بواسطة mimo vip مشاهدة المشاركة
اللهم امين هنعمل ايه فى البلد اللى مش عارفين هتظبط امتى الله المستعان
شكرا لمرورك الطيب اخى

اللهم امين هنعمل ايه فى البلد اللى مش عارفين هتظبط امتى الله المستعان
شكرا لمرورك الطيب اخى
mimo vip غير متواجد حالياً  
قديم 01-16-2018   #5
معلومات العضو
موقوف
 
اسلام الماجيك
افتراضي رد: كيف تحمى سيارتك من السرقة هام جدا لجميع الاعضاء

مشكور على الموضوع الرائع
تسلم الايادى
وربنا يسترها

اسلام الماجيك غير متواجد حالياً  
قديم 01-16-2018   #6
معلومات العضو

دوشجي فعال

 
mimo vip
افتراضي رد: كيف تحمى سيارتك من السرقة هام جدا لجميع الاعضاء

المشاركة الأصلية كتبت بواسطة اسلام الماجيك مشاهدة المشاركة
مشكور على الموضوع الرائع
تسلم الايادى
وربنا يسترها

.

نورتنى بمرورك يا اسلام
ونورت المنتدى بتسجيلك فيه
دومت بخير
mimo vip غير متواجد حالياً  
قديم 01-16-2018   #7
معلومات العضو

دوشجي فعال

 
samia badrawy
افتراضي رد: كيف تحمى سيارتك من السرقة هام جدا لجميع الاعضاء

هقول لبابا عليهم

samia badrawy غير متواجد حالياً  
قديم 01-18-2018   #8
معلومات العضو

دوشجي فعال

 
mimo vip
افتراضي رد: كيف تحمى سيارتك من السرقة هام جدا لجميع الاعضاء

المشاركة الأصلية كتبت بواسطة samia badrawy مشاهدة المشاركة
هقول لبابا عليهم


شكرا لمرورك الطيب
samia badrawy likes this.
mimo vip غير متواجد حالياً  
قديم 02-07-2018   #9
معلومات العضو

دوشجي

 
aya raof
افتراضي رد: كيف تحمى سيارتك من السرقة هام جدا لجميع الاعضاء

ربنا يستر
تسلم

aya raof غير متواجد حالياً  
قديم 02-07-2018   #10
معلومات العضو

دوشجي فعال

 
mimo vip
افتراضي رد: كيف تحمى سيارتك من السرقة هام جدا لجميع الاعضاء

المشاركة الأصلية كتبت بواسطة aya raof مشاهدة المشاركة
ربنا يستر
تسلم

اللهم امين

شكرا لمرورك الطيب دومتى بخير
mimo vip غير متواجد حالياً  
قديم 02-18-2018   #11
معلومات العضو

دوشجي فعال

 
mimo vip
افتراضي رد: كيف تحمى سيارتك من السرقة هام جدا لجميع الاعضاء

المشاركة الأصلية كتبت بواسطة mimo vip مشاهدة المشاركة
اللهم امين

شكرا لمرورك الطيب دومتى بخير


.....................................
mimo vip غير متواجد حالياً  
قديم 05-07-2018   #12
معلومات العضو

دوشجي

 
احمد غازى
افتراضي رد: كيف تحمى سيارتك من السرقة هام جدا لجميع الاعضاء

فعلا الحراميه كتير اليومين دول ربنا يسترها من عنده

احمد غازى غير متواجد حالياً  
قديم 05-07-2018   #13
معلومات العضو

دوشجي فعال

 
mimo vip
افتراضي رد: كيف تحمى سيارتك من السرقة هام جدا لجميع الاعضاء

المشاركة الأصلية كتبت بواسطة احمد غازى مشاهدة المشاركة
فعلا الحراميه كتير اليومين دول ربنا يسترها من عنده



اللهم امين

شكرا لمرورك الطيب
mimo vip غير متواجد حالياً  

Powered by vBulletin™ Version 3.8.7
Copyright © 2019 vBulletin Solutions, Inc. All rights reserved.
Content Relevant URLs by vBSEO 3.6.1 منتديات