تسجيل الدخول


العودة   منتدى مملكة الدوشجية > القصص والروايات > الروايات الرومانسية

الروايات الرومانسية روايات رومانسية , روايات احلام , روايات احلام , احلام , روايـات احلام المصورة , روايات عبير , روايات عبير مكتبة زهران , روايات عبير مكتبة مدبولي , روايات عبير دار النحاس , روايات غادة , روايات غادة , الروايات الرومانسية الاجنبية , روايات ما وراء الطبيعة , أغاثا كريستي , روايات باربرا كارتلاند , روايات ميشال زيفاكو , سلسلة الرجل المستحيل , روايات عالمية مترجمة للجيب , روايات فانتازيا

أحذرك لا تخدعنى الجزء الأول بقلمي

" لا تخدعنى " .... الجزء الأول أبطال الجزء الأول < فــــيـــروز – يـاســـيـن – خــلود – وائـل > <

 
 
  #1  
قديم 12-05-2018
الصورة الرمزية maiasem

دوشجي جديد

رقم العضوية : 109530
تاريخ التسجيل : Dec 2018
مجموع المشاركات : 6
maiasem غير متواجد حالياً

maiasem


 


" لا تخدعنى " .... الجزء الأول
أبطال الجزء الأول < فــــيـــروز – يـاســـيـن – خــلود – وائـل >
< فى الجامعة بداية السنة الرابعة .. فيروز وصديقتها خلود قاعدين مع بعض و فى الجانب الأخر ياسين و وائل >
خلود : انتى بقيتى كده ليه يا فيروز بقا دمك سم اووى
فيروز : خلود هقوم واسيبك عايزانى اقوم ارقص يعنى
خلود : لا مقولتش ارقصى طبعاً .. بس انا قصدى تضحكى وتقلعى الاسود بقا و تفكرى فى حياتك ان كان باباكى ومامتك اتوفوا دى مش اخر الحياة انتى لسه عايشة وروحهم مش هترتاح وانتى بالشكل ده سنة وانتى معقدة حواجبك و لابسة اسود و مسكنة الحزن فى جيوبك اييه ما تفوقى بقا .. انا خايفة عليكى
فيروز : انا هقوم امشى احسن انا مش فايقالك
خلود : طيب استنى بس هقولك حاجة
فيروز : حاجة إيه إتفضلى قولى .. أكيد حاجة شبه وشك
خلود : بصى شايفة الاتنين اللى هناك دول ( تشاور ع ياسين و وائل )
فيروز : آه .. مالهم العيال دول
خلود : عيال
فيروز : أخلصى مالهم
خلود : الولد اللى هناك ده مش واخدة بالك انه بيبصلك من ساعة ما قعدنا
فيروز : تصدقى إنتى تافهة يا خلود هى دى الحاجة اللى هتقوليهالى
خلود : ياساتر عليكى يا شيخة قومى يابت امشى ده انتى مادة خام للنكد طول ما انتى جانبى بلقط منك شحنات نكد وبواخة
فيروز : أنا بفكر أقووم أروح
خلود : هتروحى ليه ولمين أنا مش فاهمة إنتى ليه قاعدة لوحدك ومش عايزة تروحى عند حد من قرايبك
فيروز : حد من قرايبى ايه انتى كمان محدش بيتحمل حد وكمان انا عايشة كويس ومش عايز اسيب البيت اللى فيه روح بابا وماما
خلود : براحتك بس خليكى بقا لما نروح سوى
فيروز : طيب بس بلاش رخامتك دى
خلود : رخامتى بذمتك خوخة رخمة
فيروز : آآه رخمة جداً جداً .. هو إنتى كنتى بتقولى مين فيهم اللى بيبصلى
خلود : هههههههههه معرفش مش أنا تافهة
< ياسين و وائل فى الجانب الآخر >
ياسين : دى جد أوى يا ابنى .. وشها مش بيبتسم ابداً
وائل : صحابها بيقولوا عليها خميرة عكننة وشها مش بيضحك للرغيف السخن
ياسين : هههههههه وشها مش بيضحك لإيه ؟!
وائل : قوم يا عم نمشى من قدام البت دى بدأت تبصلنا و بوشها ده ممكن تقوم تشتمنا ولا حاجة
ياسين : وشها .. دى قمر يابنى دى مفيهاش غلطة
وائل : قمر إيه يغور الجمال من السحنة الكشرية دى
ياسين : بقولك إيه ..غور إنتا شوف إنتا رايح فين
وائل : طيب وأنا اللى كنت ناوى أكلملك صاحبتها وأطلعلك برقم تليفونها
ياسين : بتتكلم جـد .. طيب هاته وليك اللى إنتا عايزه .. هو إنتا تعرف صاحبتها منين ؟!
وائل : عارف صاحبتها من السنة اللى فاتت كنا فى كورسات سوى
ياسين : طيب أنا مستنى الرقم إنهاردة ورينى بقا إنتا قدها ولا لأ
وائل : ماشى يا عم بس إنتا قلت ليا اللى أنا عايزه
ياسين : بس هاته و شوف يا عم
< فيروز تودع خلود وتخرج و وائل يلحق خلود قبل ما تغادر الجامعة وتخرج >
وائل : خلود إزيك ؟
خلود : الحمد لله .. إزيك يا وائل
وائل : أنا تمام الحمدلله .. اخبارك
خلود : انا كويسة بس ايه اللى فكرك بيا انهاردة بالذات
وائل : اصل كنت عايزك فى حكاية كده
خلود : خير فى ايه ؟!
وائل : صاحبتك اللى كانت معاكى من شوية
خلود : فيروز!
وائل : فيروز .. آآه فيروز
خلود : مالها ؟
وائل : م الأخر ياسين صاحبى كان عايزها فى موضوع ضرورى اوى و كان عايز يكلمها
خلود : آآه ياسين صاحبك اللى كان قاعد يبصلها
وائل : ايوة الله ينور عليكى ما انتى مفتحة اهو ( فى سره ..طول عمرك داهية )
خلود : عايزها فى إيه ؟!
وائل : معجب بيها و نفسه يتكلم معاها
خلود : ( بتفتكر حالة فيروز و بتفكر ان ده ممكن يكون الحل اللى يخليها تفكر فى نفسها شوية ) وائل هو صاحبك ده أخلاقه كويسة
وائل : ياسين ده راجل وجدع أوى و إبن ناس والله يابنتى
خلود : بص يا وائل أنا هقولك حاجة فيروز باباها ومامتها ماتوا من سنة فى حريق فى مكتب باباها و من السنة اللى فاتت وهى حالتها مش بتتغير و ظروفها خاصة اوى عشان كده لو هو حد مش كويس بلاش هى مش ناقصة و هيبقا ذنبها فى رقبتنا
وائل : والله كان قلبى حاسس ان البنت دى في حاجة صعبة فى حياتها بس صدقينى هو راجل و جدع اوى
خلود : خلاص انا هديك رقمها بس ياريت ميقولهاش هو جاب الرقم منين
وائل : متخافيش والله مش هيجيبلها سيرة
خلود : لحظة هكتبلك رقمها .. ( تكتب رقم فيروز فى ورقة وتسلمها له) وياريت تبقا تخلينى اتكلم معاه فى مرة
وائل : إن شاء الله .. انا هروح بقا لانه واقف يبصلى و عيونه هتتخلع هناك اهو
خلود : طيب انا امنتك يا وائل .. سلام
< وائل باتجاه ياسين >
ياسين : هاااا عملت إيه ؟
وائل : عيب عليك هو انتا شايفنى ايه .. سوسن
ياسين : قالتلك ايه ؟
وائل : خد يا عم ده رقم فيروز
ياسين : فيروز .. رقمها ! بتهزر ؟
وائل : والله رقمها .. بس متقولش انتا جبت الرقم منين وياللا بينا بقا انتا قلت ليا اى حاجة وانا واقع مع الجوع تعزمنى بقا ع وليمة اعتبر نفسك عازم عكرمة او ابو جهل عايز فخدة ده لو مكنش خروف
ياسين : فخدة وخروف و عازم عكرمة .. طيب قداامى يا تور
< فيروز ف البيت لوحدها قافلة كل الابواب و منورة نور البيت كله و ع سريرها بتكلم صور باباها ومامتها و الدموع ع خدها >
فيروز : وحشتينى يا ماما وحشتنى اوى يا بابا حاسة انى بردانة من غيركم الوحدة صعبة اووى من غيركم الجو مخيف و لو كنت روحت قعدت عند حد كده كده كنت هرجع اعيش لوحدى لانى محدش هيتحملنى كتير محتاجلكم اوى .. الدنيا صعبة وخايفة من كل اللى حواليا ( يرن التليفون برقم غريب ) ايه الرقم ده ؟!
آلـــو ...
ياسين : آلو
فيروز : (بصوت مخنوق من البكاء ) أيوة مين معايا
ياسين : أيوة أنتى صوتك ماله .. إنتى بتعيطى
فيروز : ممكن اعرف مين معايا ؟
ياسين : انا بقالى مدة كبيرة اووى لو قولتلك قد ايه مش هتصدقى نفسى اسمع صوتك ويوم ما اسمعه تكونى بتعيطى
فيروز : طيب ممكن اعرف انتا مين .. وتعرفنى منين ؟!
ياسين : انا حد للأسف بعيد عنك دلوقتى .. حاسس إنى عاجز لأنى مش جانبك و إنتى حزينة وبتبكى
فيروز : لو سمحت انا مش ناقصة الغاز .. يا تقول انتا مين يا تقفل
ياسين : طيب ممكن اطلب منك طلب اولا
فيروز : اتفضل وياريت تقفل بعد كده
ياسين : انا مفكرتش ابدا انى ممكن ازعجك .. بس انا مش طالب حاجة منك غير انك تخلينى اسمع صوتك لو مرة واحدة فى اليوم وحياة اغلى حد عندك .. فيروز ارجوكى مترفضيش ورحمة باباكى ومامتك
فيروز : طيب انتا ليه بتحلفنى بيهم
ياسين : لانى نفسى اسمع صوتك بس ومش قاصد ابدا انى اجبرك بس ارجوك متحرمنيش من انى اكون جانبك من بعيد
فيروز : ممكن اعرف اسمك ايه ؟
ياسين : تحبى انتى اكون اسمى ايه فى حياتك
فيروز : مش عارفة ..
ياسين : طيب خلاص انا هقولك يا روز وانتى قوليلى اى اسم يخطر ع بالك
فيروز : لا طبعاً .. لازم اعرف اسمك
ياسين : طيب خلاص انا هقولك يا روز اخر تلت حروف من اسمك وانتى قوليلى سين اخر تلت حروف من اسمى .. يبقا اسمى ايه
فيروز : اسمك غلسين ؟!
ياسين : هههههههههههه لا بجد حلوة منك .. اسمى ياسين
فيروز : طيب يا سين جبت رقمى منين
ياسين : مش مهم انا مش طالب منك اى التزامات غير انى اسمع صوتك .. انتى قاعدة بتعملى ايه وكنتى بتعيطى ليه
فيروز : يااااا بالسرعة دى اسئلة .. انا مكنتش بعمل حاجة و العياط ده حاجة مش جديدة
ياسين : انتى ليه منمتيش لدلوقتى ؟
فيروز : اقولك بصراحة ..
ياسين : ياريت
فيروز : خايفة انام
ياسين : انتى اكلتى ؟
فيروز : اه اكلت ف الجامعة
ياسين : بس انتى كنتى بتاكلى مع صاحبتك ساندوتشات بدرى اووى كانت الساعة لسه 12
فيروز : نعم ده انتا معايا فى الجامعة و متابع كمان
ياسين : انا متابع من زمان اووى مش قولتلك لو عرفتى من امتى هتستغربى
فيروز : طيب مش هتقولى برضه جبت الرقم منين ؟
ياسين : طيب تقومى تاكلى الاول ممكن و مش هحلفك تانى غير بـ ربنا و ياريت لو تجيبى رقم البيت عندك
فيروز : رقم البيت ؟! ... ليه ؟
ياسين : عشان اتصل ع الارضى وافضل معاكى لغاية ما تاكلى وتنامى .. وممكن كمان احكيلك حدوتة لغاية ما تنامى اهو اى صوت عشان تنامى مطمنة
فيروز : طيب ليه عايز تعمل كل ده ؟!
ياسين : من غير اسئلة انا حابب اكون جانبك وصدقينى مش لسبب و مش هتعرضلك فى الجامعة ولا حتى هخليكى تشوفينى عشان متفكريش انى ممكن اكون بكلمك عشان كده
فيروز : طيب خلاص ماشى .. ع فكرة انا كنت خايفة مع ان المفروض اكون اتعودت
< ياسين بياخد رقم البيت و بيفضل لمدة طويلة يتكلم هو وفيروز و بتاكل وبتنام فى امان و بتمر الايام و ياسين كل يوم بيكلمها ويسالها عن حالها وتنام ع صوته و يراقبها فى الجامعة من بعيد و لاحظ التغيير عليها من اول ما ابتدوا كلام وفى كل يوم كانت فيروز بترجع للحياة واحدة واحدة رجعت تبتسم و بعد فترة طلب منها ياسين تغير اللون الاسود وفعلا فيروز اتغيرت وغيرت اللون الاسود احساسها زاد بالامان عشان حست ان فى حد مسئول عنها بيسالها اكلتى ولا ماكلتيش مبسوطة ولا زعلانة بيقولها تعمل ايه واوقات كتير بيضحكها ليالى كتير كانت فيروز بتنام ع صوته وتصحى الصبح تلاقى الخط لسه مفتوح و مستنيها تصحى عشان يقولها صباح الخير حياتها بقى فيها شئ مهم و حد مهتم لدرجة انه اخد عنوانها وبقا بيروح فى ليالى البرد والرعد عشان متخافش ويقف تحت البيت عشان متحسش بخوف وفى يوم من الايام حس بخوف فى صوتها حب يطمنها قالها متخافيش انا جانبك واقف تحت البيت وانتى منورة النور متخافيش من حاجة الفضول زاد اوى عندها وبعد ما كانت خايفة فتحت البلكونة وخرجت عشان تبص وتشوفه وتشوف ملامحه وفعلا شافته واول ما عنيه لمحتها ف البلكونة ابتسم كان هيهرب بسرعة و يستخبى بس مقدرش كان عايز يبصلها اكتر وقت ممكن شافها وشافته اخيراً شافت ياسين و عرفت شكله و حفظت ملامحه اللى رسمتها بالف صورة وبالف شكل فى الفترة اللى فاتت و بعد لحظات طويلة من النظرات ما بينهم طلب منها تدخل تنام وهى طلبت منه انه يمشى من البرد هى خلاص اطمنت وعدت الليلة وظهر فجر يوم جديد هيتقابلوا فيه فى الجامعة لاول مرة >
أرجوووك .... لا تخدعنى.....

 

 

 

 

ننصحك بمشاهدة المواضيع التالية ايضا

لك وحدك ل عزيزة على
الحب رزق ل عزيزة على
دعني أحبك غريس غرين
أحذرك لا تخدعنى الجزء الأول بقلمي



 
التوقيع : maiasem

التعديل الأخير تم بواسطة sudr_madian ; 12-05-2018 الساعة 10:58 AM

Powered by vBulletin™ Version 3.8.7
Copyright © 2019 vBulletin Solutions, Inc. All rights reserved.
Content Relevant URLs by vBSEO 3.6.1 منتديات