منتدى مملكة الدوشجية

منتدى مملكة الدوشجية (http://www.dawshagya.org/vb/index.php)
-   المطبخ - كتب طبخ (http://www.dawshagya.org/vb/forumdisplay.php?f=13)
-   -   طريقة عمل السردين المخلل فى البيت2018 طريقة عمل الفسيخ فى البيت2018 شم النسيم2018 استعدي لشم النسيم بالفسيخ والسردين (http://www.dawshagya.org/vb/showthread.php?t=167662)

shaimaa shosho 04-15-2018 12:01 PM

طريقة عمل السردين المخلل فى البيت2018 طريقة عمل الفسيخ فى البيت2018 شم النسيم2018 استعدي لشم النسيم بالفسيخ والسردين
 
طريقة عمل الفسيخ2018 - طريقة عمل السردين المخلل 2018- سردين وفسيخ شم النسيم - احلى سردين وفسيخ مخلل لشم النسيم - شم النسيم 2018- استعدي لشم النسيم بالفسيخ والسردين



http://www.dawshagya.org/vb/storeimg...980465_718.jpg
ممكن تقدمى الفسيخ من بصل اخضر وخس


باقي أقل من شهر على عيد شم النسيم، علشان كده النهارده جبنا لك طريقة تخليل الفسيخ والسردين في البيت، علشان تحضّريهم من دلوقتي وتبقي ضامنة نضافتهم وسلامة عيلتك..

الفسيخ
المقادير:
2 سمكة كبيرة بوري
كيس ملح
كمون وشطة (اختياري)

الطريقة:
1- هاتي سمك البوري ووقفّيه بحيث تكون الرأس لأسفل والذيل لفوق، علشان ينزّل الدم اللي فيه من الخياشيم، وبعد كده سيبيه ينشف في الشمس لمدة ساعة أو ساعتين، أو ممكن تدخّليه في فرن ساخن لمدة من 2 : 5 دقائق.

2- بعد كده هاتي السمك، واعملي له تدليك خفيف بإيدك، علشان بعد ما السمك يتخلل يكون متجانس مع بعضه.

3- افتحي خياشيم السمكة، وحطّي فيها كمية كبيرة من الملح والشطة والكمون بحيث تملي كل فراغ الخياشيم، وبعد كده حطّي الملح على جسم السمكة من برة وحرّكيه عليه من تحت لفوق.

4- هاتي ورقة بيضة كبيرة وحطّي عليها كمية من الملح، وبعد كده حطّي عليه السمكة، وبعد كده رشّي عليه كمية تانية من الملح، ولفّي عليها الورقة بحيث تغطّيها تماما، وبعد كده لفّيها بحوالي 4 أو 5 ورقات كمان علشان تمنعي الهواء من إنه يوصل للسمك، وبعدين لفّيه في 3 أو 4 أكياس بلاستيك، وكرّري الخطوات دي مع باقي السمك، بس كل واحدة لوحدها، وفي الآخر حطّيه في علبة زجاج أو بلاستيك واقفلي عليه كويس.

5- سيبيه في مكان دافي في المطبخ لمدة 3 أيام وبعد كده افتحي العلبة واقلبي الأكياس اللي فيها الفسيخ على جنب تاني من غير ما تفتحيها، واقفلي عليه العلبة مرة تانية، وتاني يوم اقلبي الفسيخ بنفس الطريقة على جنب مختلف وكرّري نفس الخطوة دي يوميا.

6- بعد 15 يوم تقدري تفتحي على الفسيخ وتنظّفيه من القشور وتفتحيه وتنضفي بطنه، وبعد كده انقعيه في خليط من الخل والليمون علشان تعقّميه من الميكروبات، ولو حسّيتي إن الفسيخ طلع مالح معاكي أوي، ممكن تحطّيه في ميه مغلية لمدة دقيقتين علشان تقلّلي من ملوحته.

http://www.dawshagya.org/vb/storeimg...980464_445.jpg
السردين بيحتاج من اسبوع لاسبوعين عشان يستوى


السردين المخلل
المقادير
2 كيلو سردين بلدي
كوب زيت نباتي
كيس ملح
شطة

الطريقة:
1- هاتي السردين واشطفيه كده على السريع بالميه بس من غير ما تفتحيه، وبعدين حطّيه في مصفاة لغاية ما ينزّل كل الميه اللي فيه.

2- اخلطي كيس الملح مع الشطة في طبق، وحطّي كمية صغيرة من خليط الملح والشطة في خياشيم السردين.

3- هاتي علبة بلاستيك وافردي فيها 2 أو 3 أكياس بلاستيك، ورصّي طبقة من السردين في قاعدة العلبة بحيث إن كل سردينة تبقى عكس الثانية، وبعد كده رشّي كمية من خليط الملح والشطة وحطّي ملعقة كبيرة زيت، وبعد كده حطّي طبقة تانية من السردين وكرّري نفس الخطوات لغاية ما كمية السردين اللي عندك تخلص.

4- في الآخر حطّي باقي الملح على الوش وضيفي من 2 : 3 ملاعق كبيرة، وبعدين اربطي الكيس كويس أوي، وبعد كده غطّيه بطبقة من الورق الفويل، وبعد كده اقفلي العلبة بالغطاء بتاعها كويس.

5- سيبي السردين لمدة أسبوع أو أسبوعين على حسب حجم السردين، وكل يومين قلّبيه بس من غير ما تفتحي الكيس بإنك تمسكي الكيس وتقلبيه فوق وتحت.

6- بعد ما يتخلل السردين نظفيه وحطيه في علبة وحطي عليه الزيت والليمون والخل وشيليه في الثلاجة لوقت اللزوم.. وبالهنا والشفا.

وبكده تكوني استعديتي لشم النسيم..
وعملتي لعيلتك فسيخ وسردين نظيف ومضمون..







♥Cuteღgĭrℓ♥ 04-16-2018 09:09 PM

رد: طريقة عمل السردين المخلل فى البيت2018 طريقة عمل الفسيخ فى البيت2018 شم النسيم2018 استعدي لشم النسيم بالفسيخ والسردين
 
مينفعش تبعتيلنا الاطباق دى ياشيمو

جميل اوى تسلم ايديك

shaimaa shosho 04-17-2018 02:54 PM

رد: طريقة عمل السردين المخلل فى البيت2018 طريقة عمل الفسيخ فى البيت2018 شم النسيم2018 استعدي لشم النسيم بالفسيخ والسردين
 
يااااااااااارب كونا كلناها سوا
انا نفسى فية جداااااااااااا

تسلمى ياقمر نورتى الموضوع


الساعة الآن 01:20 AM.

Powered by vBulletin™ Version 3.8.7
Copyright © 2019 vBulletin Solutions, Inc. All rights reserved.
Content Relevant URLs by vBSEO 3.6.1 منتديات